今晚繼續有德國盃第1圈賽事，德乙聖保利主場對德甲慕遜加柏，聖保利近排非常黑仔，難得簽到日本國腳宮市亮，但卻於季前受重傷，需要長抖至年尾，痛失最強武器。慕遜加柏貴為上季德甲季軍，保持主力陣容再戰，實力有保證，相信可輕取對手，慕遜加柏讓球客勝有2.2倍唔怕跟。（無綫翡翠台、TVB13周二凌晨2時30分直播） 　　慕遜加柏最大變動係射手麥斯古斯離隊，但亦簽入利華古遜前鋒祖斯比迪米斯、漢諾威進攻中場史甸度，兩人上季德甲共有16球進帳，可進一步提升慕遜加柏攻力。加上會方正式買斷夏薩特細佬杜根夏薩特，呢位比利時新星早前熱身賽，射入全場唯一入球，協助球隊以1比0擊敗紐卡素，報答球會知遇之恩，相信今仗會繼續搏命。

事實上，慕遜加柏近期熱身賽表現出色，除咗贏紐卡素，亦擊敗波圖，看來已操起狀態。由於慕遜加柏喺聯賽，好難鬥贏拜仁慕尼黑，佢哋會比較重視盃賽，力爭錦標，應會盡力贏場漂亮勝仗。

聖保利當黑簽完宮市亮即傷
聖保利今夏簽下曾經効力阿仙奴嘅宮市亮，一度令人有所期望，可惜呢位22歲中場季前受嚴重膝傷，估計會缺陣至年尾，可謂得物無所用。聖保利開季兩場德乙，取得1勝1和，表現未算突出，難以越級挑戰成功。