雖然話有仇不報非君子，不過你估仇真係咁易報咩！上季收咧戰作客慘敗史篤城1比6嘅利物浦，新一季開咧戰咁啱又撞正史篤城，而且都係作客，唔通連個天都Set好個台畀紅軍報大仇？之但係原來紅軍近季經常畀史篤城食住，一班新人更係磨合需時，今場作客讓唔起對手，捧史篤城讓球勝啦！紅軍想報仇？下次先啦！（now 621周日晚11時直播）

狂購7新兵 磨合需時
踏入後謝拉特時代嘅利物浦，冇乜人對佢哋太大期望，連部分利迷都係咁諗。紅軍至今一共使咗7,750萬鎊（約9.3億港元）引入賓迪基、羅拔圖法明奴、尼達利基尼等7位新兵，喺英超僅次於使咗8,310萬鎊（約9.98億港元）嘅曼聯。買人係一件好考眼光嘅事，你見到曼聯上季錯簽法卡奧同迪馬利亞就知喇！

羅渣士教咗利物浦3季，未計今夏佢合共使咗2.11億鎊（約25億港元）簽入波連尼、史杜列治、巴洛迪利、洛夫雲等24位球員，但著名足球評述員舒利亞認為只有菲臘比古天奴先算係成功收購：「史杜列治都唔算係，佢太易受傷嘞！」所以，好難講紅軍今夏簽嘅新兵係咪真係啱使，抑或只不過又係好睇唔好食。況且依家陣中咁多新兵，都係嗰句：磨合需時呀！

近季開咧戰 成績肥佬
上季對史篤城大敗1比6之仇，利物浦又點會忘記，新隊長佐敦軒達臣不斷重複話佢哋要報仇，但唔係真係話報就報，紅軍對上6次作客史篤城只係贏得兩場，再睇埋紅軍過去10季開咧戰成績，亦只係錄得3勝4和2負成績，以一支英超名牌嚟講，咁嘅戰績真係完全唔及格。反觀史篤城上季主場戰績都幾犀利，尤其對名牌特別醒神，贏過阿仙奴、熱刺、修咸頓，又和過曼聯，加埋大炒利物浦，不列顛尼亞球場堪稱「名牌墳墓」，史軍球員心理佔優，仲有得受讓，絕對抵捧！