今晚德國盃早場直播戲碼別具意義，德丙真尼沙主場迎戰多蒙特，雙方上次碰頭已係25年前，當時適逢兩德統一大喜日子，雙方球迷一齊忘情慶祝，今次再遇，多蒙特官網早喺一星期前已大篇幅重提舊事，相信球員都唔敢Hea踢，「蜜蜂兵團」多蒙特無論實力，狀態同人腳完整性都遠勝主隊，捧讓球客勝。（TVB 13周日晚8時30分直播）
上次對碰賀「兩德統一」
德丙嘅真尼沙來自前東德，係1989年東德頂級聯賽亞軍，攞到歐洲足協盃參賽資格，90年歐洲足協盃32強巧遇西德嘅多蒙特，結果兩回合賽事多蒙特都贏2比0，但次回合真尼沙主場喺10月2日舉行，正係兩德統一大日子嘅前一日，雙方加埋過萬名球迷不計勝負，全場一齊燃點煙花火炮慶祝嘅場面，事隔25年仍令人懷念。今晚喺只可容納一萬球迷嘅真尼沙河畔球場亦全場爆滿，恭迎呢場別具意義嘅比賽。
多蒙特啱啱喺歐霸盃兩回合大炒奧地利禾夫斯貝加6粒晉級，新帥杜曹認為經歐霸盃磨劍過後球員狀態急升。真尼沙今季踢咗兩場德丙只入過一球12碼，攻力弱陣容又殘，預期輸兩球已係最低消費。
