喺武漢舉行嘅東亞錦標賽話咁快嚟到最後一輪賽事，當中南韓、北韓同東道主中國都仲有機會爭冠軍，今日頭場兩韓合演「朝鮮半島打吡」，如果南韓贏波就肯定捧盃，唔使理另一場比數結果，莊家開南韓讓半一咁辣，似乎有啲計，肥叔認為「太極虎」上盤不容錯過。（now 633周日下午5時10分直播）

肥叔一向都有留意亞洲足球嘅發展，由於西亞球隊近年直插谷底，形成東亞雙雄日本同南韓穩坐頭兩把交椅，並逐漸同其他亞洲球隊愈拉愈遠。雖然係咁，上年世界盃慘敗同今年亞洲盃失利，令兩軍冇晒飛士，不過南韓好歹都殺入亞洲盃決賽，證明德國籍主帥史泰歷克嘅重建工作都算順利，因此對今屆東亞賽亦寄予厚望。

南韓喺今日東亞錦同北韓上演「朝鮮半島打吡」，睇番依家形勢，「太極虎」領先中國及北韓1分排榜首，只要今仗贏波，就唔使理尾場中國對日本嘅賽果，肯定封王。初盤南韓要讓半一都算幾辣，肥叔同啲行家飲茶時傾開偈，佢哋話其他博彩公司嘅「太極虎」個上盤愈吹愈熱，睇番南韓被壓到落八一水咁低，似乎有啲計，一於撐佢哋贏波又贏盤。

尾場中日大戰吼國足
若果南韓順利贏波捧盃，就會令尾場中國對日本變成例行公事，肥叔本來唔多捧國足場，因為每當對佢哋有期望嗰陣多數中伏，反之則會贏盤嚇你一跳，所以見親都少掂為妙。不過今屆國足表現確實令人眼前一亮，上仗泊大巴戰勝北韓，肥叔從來唔理係咪踢漂亮足球，最重要係幫到大家贏錢，日本現時只得1分未開齋，今場豪言要狂攻力爭首捷，隨時得不償失，仲要開平手盤，睇嚟莊家對「瀛男」信心不足，寧願捧番有地利嘅國足。（now 633周日晚8時10分直播）