周日晚英超另一場紐卡素主場鬥修咸頓，「喜鵲」今季改由麥卡倫領軍，收購咗3位重量級球員，但球隊喺季前熱身賽表現麻麻，隊波仲未Run順，今晚面對剛喺歐霸盃第3圈晉級，一早已經踢起狀態嘅修咸頓，相信好難喺主場打響頭炮，平手盤阿謙捧作客嘅「聖人」。（now 622周日晚8時30分直播）

紐卡素仲未谷起
前紐卡素主帥柏度上季中途「跳船」，搞到成隊波冇晒方向，代領隊卡華最終只能帶領球隊以第15名完成英超，唔使降班叫做執番身彩。「喜鵲」班主今季痛定思痛，搵嚟前英格蘭主帥麥卡倫領軍，仲簽PSV翼鋒韋拿杜姆、安德列治前鋒米卓域克同後衞梅賓巴文古路，配合柏比斯施斯同艾約斯佩雷斯，整體實力無疑係升咗呢，不過，新球員加盟始終需要時間磨合，紐卡素近期喺熱身賽表現甚差，4仗不勝且輸咗其中3場，球隊仍未操起狀態，今仗唔多樂觀。

對手修咸頓上季繼續交出好表現，最終以第7名過終點，仲攞埋歐霸盃嘅參賽資格。「聖人」今夏雖有中場舒尼達連同右閘尼達利基尼離隊，但同時搵嚟荷蘭門將史基倫堡同中場佐迪卡斯、西班牙中場桑美占美利斯等好手，實力其實冇乜點削弱到。修咸頓由於要備戰歐霸盃第3圈外圍賽，所以喺7月頭已經開始友賽，結果成功谷起狀態，喺早前歐霸盃面對荷甲球隊維迪斯，兩回合大勝對手5比0過關，今仗面對狀態一般嘅紐卡素，作客一樣有力贏波，平手盤阿謙推介「聖人」！