屈福特新升班交學費
今日英超開鑼，球迷餓波幾個月，腎上腺素必大幅提升，但各路大軍抖咗咁耐，又有咁多球員出入，未必係出擊良機，所以首周建議小注行事，今日揀嚟人腳相對較穩定嘅愛華頓，主場對升班球隊屈福特，樂比認為客軍係時候交學費，捧上盤！（now623台周六晚10:00直播）

愛華頓上季僅以11名衝線，係近年表現最差一季，領隊馬天尼斯承受一定壓力，幸好董事局作風比較穩重，唔鍾意輕易換人，馬天尼斯今季依然有機會證明自己能力，特別係愛華頓今季唔使分心應付歐洲賽，相信聯賽排名有力爭取前8甚至前6。

拖肥等史東斯上車先增兵
愛華頓今季轉會策略可謂以不變應萬變，主要收購僅得湯卡華利及迪路菲奧，某程度上係因為史東斯就加盟車仔一事仍在討價還價之中，相信落實後拖肥糖就會有資金再補強，不過少變動係好事，起碼呢個班底已建立一定默契，球員質素比上不足、比下有餘，主場出擊仍有保證。

另一邊廂升班球隊屈福特變動甚大，領隊改由前華倫教練科里斯執教，但佢首次登陸英超，能否適應仍有待證明，球員方面亦有頗大變動，雖然球會都算捨得使錢，新來投嘅球員如伊天卡普爾、比哈美等都有一定質素，問題係未知能否及時融入。

既然英超唔建議搏錘，都要搵啲好嘢畀讀者，美職上周六創下最多入球一日，8場波合共出現39個入球，其實美職今季引入多名高質素球星，而且呢班球員又大多係攻擊球員，故美職娛樂性可謂愈來愈豐富，入球數字亦大增。

奧蘭多城專做大Show
其中一隊值得留意係奧蘭多城，呢隊波近期瘋狂入波同失波，近4仗出現咗24個入球，平均每場有6粒，前鋒施利拿連腳風極順，加上巴西球星卡卡無限提供彈藥，唔使擔心冇波入，不過佢哋條防線有如豆腐渣，今仗主場對費城聯相信會上演入球騷，捧大。（TVB301周日早上7:30直播）