曾經話過日乙球隊入面，最正氣係榜首嘅大宮松鼠，但係今日佢哋主場對櫪木SC呢隊班尾波，主勝竟然都有1.4倍咁筍，比想像中好分咗啲，實在惹人懷疑，索性簡單啲博吓個同樣唔多正路嘅1.85倍入球細。

大宮唔經唔覺打咗個七連勝，拋離次席磐田山葉14分，來季重返日職差唔多係坐定粒六。近況靚、實力強，按理佢哋今日主場迎戰尾三嘅櫪木，可以話實食冇黐牙，難怪日本Toto博彩嘅賽前勝負投票，有81個巴仙網友追捧大宮個W。

櫪木正選龍門停賽
唔只咁，撇開友誼賽唔計，大宮過往2戰櫪木全勝不特止，仲要場場派蛋，一場2:0，一場4:0，打到對手冇得還拖。更重要嘅係，櫪木改由倉田安治出任監督之後，取得勝和負各一，叫做有些少起色。不過，上場輸畀熊本嗰陣，正選龍門櫻井繁領紅，今場要竹重安希彥頂檔，理論上點都會影響後防穩定性。

走勢、往績、實力乜都贏晒，大宮都有1.4倍咁好分？呢個水位折換成亞洲盤，大宮要讓1球/球半咁上下，呢類盤口好易贏波輸盤，甚至和波都吹佢唔脹，咁就不如買個入球細算嘞，事關大宮已經連開6口入球大，今場冇理由大細會1.85倍均水咁奇怪。