雖然英超係全世界最受歡迎嘅聯賽，不過都總會有球迷唔鐘意睇架嘛，如果你係西甲或者意甲迷，今晚可以選擇睇華倫西亞主場對羅馬，「蝙蝠軍團」有個夏季傳統熱身賽「柑橘盃」，今次就搵嚟「雌狼」羅馬決鬥，踢完今場，西甲同意甲就開鑼，雙方都希望透過呢場波撥亂反正，改善防守，細盤值博。

(有線61及201台周日凌晨3時30分直播)

羅馬上月尾從阿仙奴借得門將施捷斯尼，又從車路士借入「埃及美斯」穆罕默德沙拿，而曼城嘅波斯尼亞前鋒迪斯高亦已到達羅馬做體檢。「雌狼」過去兩季喺主帥魯迪加西亞領軍下防守一向唔錯，但最近喺熱身賽失波好多，對巴塞隆拿失3球可以話係情有可原，但對士砵亭都失兩球就真係不能接受，防守再係咁曳，下場開咧戰作客維羅納真係凶多吉少，所以今場對華倫西亞，魯迪加西亞肯定會叫隊波做好防守先。

「蝙蝠」新龍馬菲賴恩靠得住
「柑橘盃」係華倫西亞傳統熱身賽，邀請歐洲勁旅嚟自己地頭作賽，上年「蝙蝠軍團」就擊敗AC米蘭捧盃成功。「蝙蝠軍團」近4場熱身賽又係唔係好掂，錄得1勝1和2負成績，對住科隆都失3球，所以今場想贏就一定要減少失波。華倫西亞最近簽入澳洲門將馬菲賴恩，呢位門將年僅23歲，但喺國家隊已經踢緊正選，馬菲賴恩身材唔算高大，但勝在反應敏捷、彈跳力強，「蝙蝠軍團」今場想保持不失睇怕都係靠佢，一於捧細！