大股東衝超心切
隨住歐洲各大聯賽陸續開鑼，肥叔亦返嚟《東方波經》為廣大讀者畀料，當大家將注意力集中晒喺英超之際，查實仲有好多好嘢，同樣今周開咧嘅英冠，有賓福特主場迎戰葉士域治，前者志切「衝超」，話事人堅緊張頭炮唔衰得，小讓平半要趁早入貨。（周六晚10時開賽）

有睇開呢個專欄嘅讀者，應該知道賓福特嘅大股東Matthew Benham，係肥叔嘅同行兼世姪，被喻為博彩界奇才，自佢入主賓福特後成績穩步上揚，上季升上英冠更打入第5位，僅僅喺升班附加賽首輪輸畀米堡無緣「衝超」，表現大獲好評。依家Matthew Benham「不務正業」，唔多理自己開設嘅博彩顧問公司，放晒手畀下屬做，全心全意想搞好賓福特，甚至忙到唔得閒同肥叔吹水，明顯係着眼「金礦」英超席位。

賓福特今季保留大部分主力，加埋上季一鳴驚人嘅表現，難怪被視為升班熱門之一，今晚喺英冠首輪坐鎮主場對住上季「六哥」葉士域治，雖然賓福特近6次交手未贏過兼輸咗5場，但肥叔認為有啲往績過舊參考價值不大，始終賓福特話事人咁緊張隊波，齋計鬥心都遠勝葉士域治喇。睇埋盤口，賓福特小讓平半之餘，仲被擠到只得七九水咁低，似乎莊家對佢哋都幾有信心，隨時愈賣愈熱轉讓半一，真係有買趁早，肥叔力撐賓軍上盤。

睇盤做人吼特魯瓦
至於法甲首輪有場升班隊對決，由上季乙組盟主特魯瓦主場對「二弟」GFCO阿些斯奧，近4次碰頭特軍僅1勝，不過莊家照開佢哋讓半球低水，肥叔一向睇盤做人，因此特魯瓦值得秤先。（周日凌晨3時開賽）