白禮頓森林大有睇頭

英超聽日先開咧，次級賽事英冠就提早一日開始，等大家早啲熱吓身、拉定筋！英冠開咧戰由「海鷗」白禮頓主場激鬥諾定咸森林，曾經喺歐洲球壇叱咤一時嘅森林原來已經有成16年未踢過英超，想再下一季升上英超？踢好今場先講喇！兩軍近五次交手有四次開入球大，加上「海鷗」有鋒將森莫亞回歸，攻力有望提升，今場一於好好睇睇上演場入球騷畀大家欣賞，大盤值博！（TVB 301周六凌晨2時45分直播）

今年係諾定咸森林創會150周年，球會特別將會徽顏色由紅色改為金色，波衫贊助商adidas亦作出配合，新一季主場波衫繼續以紅色為主色外，更配上金色邊，即刻令件波衫增添層次，睇落好高貴，另外就係胸前冇咗贊助商廣告，令人將個Focus放番落森林上面，件波衫真係誠意之作嚟！至於作客波衫就用黃色做主色，配上藍色邊，睇落勁醒神！

森林金徽金邊賀150周年
講咗咁多關於森林件新波衫，其實都係想講呢支老牌球隊非常重視今個新球季，唔想再好似上季咁，虎頭蛇尾，喺前主帥皮雅斯帶領下頭11場不敗，點知無以為繼，終喺今年2月搵嚟另一名宿費曼執教。森林喺費曼領軍下，火力強咗唔少，不過就搞到防守唔掂，今場作客白禮頓，相信好難保持清白之身囉！

白禮頓今夏增兵以進攻球員為主，最轟動就係有蘇格蘭19歲天才新星傑克夏珀由皇家馬德里來投，可惜佢今場因傷缺陣，另外就係獲得昆士柏流浪前鋒森莫亞加盟，呢位34歲老將成名於白禮頓，入球率一向都相當唔錯，今次「愛回家」，嚟到職業生涯最後階段，梗係幾大都搏盡，今仗有望增強「海鷗」嘅火力！