英冠開鑼戰冇理由死守
英冠今晚開咧有場白禮頓主場迎戰諾定咸森林，講往績兩隊近5次對賽有4次開入球大，而且白禮頓簽咗艾美利亞射手希密特、昆士柏流浪前鋒森莫亞，火力有望大幅提升，森林亦有兩大主力艾桑巴朗加、米查利安東尼奧留隊，兩隊火力十足相信會合演「大」混戰。（TVB301台周六凌晨2:45直播）

白禮頓新簽射手夠照
白禮頓上季只能夠勉強成功護級，班高層似乎開始識驚，今夏即羅致希密特同森莫亞補充前線實力。要知道入球數字偏低，正正係白禮頓上季長期低迷嘅致命傷，既然佢哋肯對症下藥，相信可以解決到呢個問題，特別係希密特上季喺西甲攻入8球，屬艾美利亞首席射手，森莫亞喺英超亦有一定入球能力，白禮頓火力有望大幅提升。

客軍森林上季攞唔到升班附加賽席位，艾桑巴朗加、米查利安東尼奧留隊之餘，配合新簽嘅打比郡前鋒占美禾特已經夠晒睇頭，而且主帥費特文近日仲話未完成組軍，睇得出呢班波野心唔細，開鑼戰梗係要同白禮頓鬥入波啦！