邊緣球星搏殺保飯碗
法甲今晚揭開戰幔，開鑼戰由力爭衞冕嘅巴黎聖日耳門（PSG）造訪里爾。PSG今晚係就係冇伊巴謙莫域，之不過由卡雲尼、拿維斯同盧卡斯洛迪古斯合組嘅鋒線，要摧毀里爾條後防綽綽有餘，PSG讓半一捧1.94倍上盤。（TVB302台周六凌晨2:30直播）

力爭法甲4連霸嘅PSG新季有個好開始，先後捧走國冠盃同法超盃，一班球員晨早入晒局。冇錯，「瑞典神箭」伊巴謙莫域喺法超盃整傷右膝韌帶，今仗肯定缺陣，至於迪馬利亞就算賽前完成轉會手續，法媒估計佢最快都要到月尾先可以為PSG披甲，不過就算兩大球星唔在陣，So What？

隨住「天使」加盟，你估拿維斯、盧卡斯洛迪古斯等球星唔驚冇碇企呀？今晚佢兩個邊緣人拍住卡雲尼攻堅，肯定會搏老命保飯碗。而且中場卡比耶季前轉投水晶宮，取而代之係更當打嘅「90後」中場史譚保利，加埋法蘭克福來投嘅門將奇雲查普，PSG整體人腳同板櫈深度，照計點都比上季更強。

里爾主力他投 新帥輸經驗
今場法甲開鑼戰，當地警方以保安理由，禁止冇波飛嘅PSG球迷前往里爾，以免佢哋惹麻煩。查實講到麻煩，里爾新季唔慌唔煩嘞！呢場波係新帥連納特嘅首場正式賽事，佢係就係曾帶領贊比亞同科特迪瓦贏過非國盃，可惜法甲領軍經驗尚淺，只係執教過索察，2013至14球季仲教到降班添。

最弊係里爾季前有中場艾達馬查奧爾、伊祖沙古爾同中堅卡積亞離隊，比利時「新魔獸」奧歷治亦已經返咗去所屬球會利物浦，幾件主力全部閃晒，季初條路都幾難行，對住PSG好難有運行。