除咗英冠之外，法甲亦喺今晚隆重開鑼，揭幕戰由聯賽三連冠嘅巴黎聖日耳（PSG）作客火併里爾。雖然PSG正式宣布獲得「天使」迪馬利亞加盟，但佢未咁快落得場，王牌射手伊巴謙莫域又因傷缺陣，對進攻影響極大，況且呢班波一向慢熱，近4季喺聯賽首輪未贏過，不過「豬頭骨」里爾亦「失血」嚴重，寧玩入球細。（TVB 302周六凌晨2時30分直播）

法甲不嬲都係靠賣「半成品」維生，直到有中東「土豪」先後入主PSG同摩納哥，先至可以喺轉會市場上同英、西、德豪門揮過，近年PSG接連簽入伊巴謙莫域、堤亞高施華、大衞雷斯、卡雲尼等球星，為法甲增添唔少星味，亦造成一隊獨大嘅局面，PSG已連續3季喺聯賽封王，今夏向曼聯羅致「天使」又好事近，真係畀佢哋玩晒。

雖然係咁，但唔代表PSG喺今晚揭幕戰贏梗，首先暗示快將離隊嘅王牌射手伊巴謙莫域，喺上周法冠盃擊敗里昂之役整傷右膝，今仗肯定唔使預佢，冇咗伊巴「咧住」，前鋒拍檔卡雲尼就變軟腳蟹唔識入波，進攻火力起碼減半。咁啱得咁蹺，PSG近4季聯賽首輪都未能打響頭炮，仲要賽和蘭斯同輸畀羅連安特之流，睇得出呢班波非常慢熱，新加盟嘅防中悍將史譚保利同來自法蘭克福嘅門將奇雲查普，應可增強球隊防守能力。

「天使」正式加盟 轉會費5.3億
不過，里爾亦唔好得幾多，今夏有守將卡積亞、中場艾達馬查奧爾、伊祖沙古爾走人，比利時前鋒奧歷治亦已經返番所屬球會利物浦，離隊嘅個個都係主力。睇番里爾之前4場熱身賽只攻入3球，攻力極度疲弱，萬幸係嗰4場只失1球，證明防線仲頂得兩嘴，遇上PSG必定穩字行先，今仗唔慌多波入，細盤咪錯過。

PSG尋晚喺Twitter宣佈，阿根廷國腳「天使」迪馬利亞正式由曼聯加盟，合約至2019年到期。據英媒報道，今次轉會費達到4,400萬英鎊（約5.3億港元），係法甲史上第3高。不過，比起曼聯簽入佢時所花費嘅5,970鎊（約7.46億港元），紅魔要勁蝕2.16億港元。