歐聯資格生死戰
意甲今日上演歐聯資格生死戰，由排第4位嘅拉素主場迎戰「3哥」拿玻里。拉素目前落後對手4分，要搶入三甲今仗非勝不可，王牌前鋒恩莫比尼近8仗怒轟8球腳風超順，主場肯定搶錢咁搶；拿玻里屬意甲火力最猛球隊，兩隊駁火格局，大細中位數調至2.5/3球，都要捧1.77倍入球大！

（TVB 302周一凌晨2時45分直播）

拉素喺下半季衝刺唔講得笑，近8場聯賽6勝2和未輸過，夾埋入咗17粒波，而且啱啱喺意大利盃殺入決賽，氣勢堅嚇親人。拉素依家只係落後第3嘅拿玻里4分，今仗贏埋就可以縮減到只差1分，主場出擊戰意必盛，肯定瘋狂撲擊。教頭施蒙尼恩沙基上周三度過41歲生日，班球員自然更加落力爭取入波，送份大禮畀主帥啦。

拉素近期着晒火最大功臣係箭頭恩莫比尼，呢位意大利國腳喺各項賽事近8仗攻入8球，重現金靴射手本色，有佢喺度拉素要入波唔難，不過拉素上周中意盃有荷蘭中堅迪維積受傷離場，若然未能復出，防守力必大減，但咁樣亦迫使施蒙尼恩沙基豁出去，以攻代守同拿玻里死過。

拿玻里鐵三角火力驚人
拿玻里除入波數目冠絕意甲外，今季亦係聯賽「作客王」，14場作客賽事只有兩場冇波入，總共轟出驚人嘅35球！原因係佢哋轉守為攻非常快速，作客比賽往往可以盡展所長，對上8場作客聯賽都攻入至少2球，不過當中亦有7仗有失波，證明拿玻里唔會因為作客而踢得保守。陣中3大「士哥拿」梅頓斯、咸錫同恩斯治尼今季聯賽夾埋入咗43球，呢個鐵三角組合唔講得笑，既然今仗兩軍鋒力都咁強悍，捧入球大包冇走雞！