由於唔少豪門嚟緊周中出戰歐聯，率先昨晚踢完聯賽，搞到今晚戲碼麻麻，阿King就睇中咗法甲巴黎聖日耳門（PSG）主場對甘岡。PSG自從歐聯戲劇性被巴塞踢出局後，惟有專心踢本土賽事，上場法足盃收起多位主力，仍然大勝晉級，一班球星抖足精神出擊，今仗有力大炒甘岡，報番首循環一敗之辱，讓球主客和巴黎聖日耳門讓兩球都要讓球主勝。

（TVB 303周一凌晨3時直播）

PSG喺歐聯大好形勢下畀巴塞反勝，成為球壇笑柄，不過佢哋知恥近乎勇，早前喺法聯盃決賽大勝勁敵摩納哥4比1成功衞冕，上仗法足盃收起卡雲尼及迪馬利亞等主力，亦大炒阿夫朗甚4蛋進身4強。PSG人腳鼎盛，專注踢本土賽事明顯超班。未計尋晚比賽，PSG落後榜首摩納哥3分，餘下賽事不容再失，今仗必定全力以赴。

甘岡曾於首循環主場2比1爆冷贏PSG，但爆冷嘅嘢可一不可再，甘岡近5次作客PSG全敗兼冇波入，其中3次輸3球或以上，另外2次都分別吞兩蛋，今仗受讓兩球都制唔過。

華倫執番正 客Ｗ冇蘭度
西甲方面，華倫西亞自從季中請番禾路執教後，已重回正軌，近兩仗都贏得精彩，今晚早場作客對近5仗1和4負嘅CF格蘭納達，華倫可望再下一城，捧客勝（Now 632周日晚6時直播）；另1場西甲，拉斯彭馬斯主場一向夠惡，曾經打和皇馬，最近1次主場擊敗前列球隊維拉利爾，今仗有力贏埋貝迪斯。

（Now 632周一凌晨2時45分直播）