今晚另一場值得留意嘅英超，一定係「狐狸」李斯特城主場對「黑貓」新特蘭，兩軍射手占美華迪、迪科爾剛於早前世界盃外圍賽一齊入波，助英格蘭贏立陶宛2比0。兩人今場各為其主互鬥射術，有另一番趣味。以波論波，李斯特城換帥後大反彈，近5仗全勝，占美華迪應該會有較多表演機會，Mic少推介讓球主勝。

（Now 622及LeSports HK應用程式周三凌晨2時45分直播）

李斯特城2月炒冠軍主帥雲尼亞里，惹來唔少批評；但現今足球世界，成績代表一切，「狐狸」由格力沙士比亞接手領軍後，表現立即脫胎換骨，佢領軍下5仗全勝，包括英超擊敗利物浦、歐聯反勝西維爾晉級，以及上仗聯賽贏史篤城2比0，占美華迪又建功，格力沙士比亞仲成為英超史上首位帶隊頭4場聯賽全勝嘅本土主帥，比起雲尼亞里更加神奇。

其實李斯特城上季可以奇迹捧英超冠軍，就係靠一鼓作氣，踢出信心，現時情況同上季非常相似，相信可以延續強勢繼續搶分。況且今場對手只係包尾嘅新特蘭，「狐狸」要喺主場球迷面前再次獲勝，難度絕對唔高。

新特蘭攻不銳守不穩
另一邊廂，34歲老將迪科爾今季英超已有14球進帳，比占美華迪仲多5球，無奈一班新特蘭隊友太不濟，往往前面入埋唔夠後面輸。最不幸係迪科爾近期踢球會賽事腳風唔多順，令「黑貓」成績死晒火，近9仗有8仗冇波入，領隊莫耶斯都束手無策，睇嚟新特蘭一日唔換帥，只會繼續沉淪，今場作客反得過。