戰神圍困難破鐵桶陣
今晚英超加開快車，最強戲碼梗係「5哥」曼聯主場對「7哥」愛華頓。紅魔雖有王牌伊巴謙莫域及悍將安達靴里拉坐完波監復出，但仍有成籮傷兵，其他球員如「福仔」拉舒福特等又唔爭氣，搞到前線死晒火，撞正硬淨嘅「拖肥糖」唔易食，今仗唔慌多波入，捧2.5球中位數嘅入球細好過。

（Now 621及LeSports HK應用程式周三凌晨3時直播）

福仔連格把握力曳
曼聯雖然近19仗聯賽保持不敗，睇落好似好醒，但實際上喺呢19仗中和咗9仗，對爭前4影響甚大，特別係主場出擊仲頻頻失分，近5仗喺奧脫福球場出戰嘅聯賽只得1勝4和，呢5仗夾埋入得4球咁大把，全部總入球都唔過3粒，包括上仗遭西布朗悶和0比0，主帥莫連奴更鬧爆前線嘅拉舒福特、安東尼馬迪爾、連格及米希達利恩把握力堅曳。

紅魔今仗有戰神伊巴謙莫域及中場安達靴里拉刑滿復出，似乎攻力會有所改善，因為伊巴係紅魔前線最可靠王牌，但上面所講5場比賽，伊巴亦4度披甲但僅入1球，反過來講曼聯太倚賴佢數胡，當佢畀人嘜死嗰陣，就缺乏板斧破鐵桶陣。加上依家有基斯史摩寧、菲爾鍾斯、桑馬達等傷兵唔踢得，其中桑馬達更係進攻泉源。雖然天價中場保羅普巴已經復操，不過「寸王」主帥莫連奴話佢今仗能否趕及上陣都好難講，令創造力進一步受削。

近4次訪紅魔少入波
另一邊廂，愛華頓啱啱喺打吡戰作客以1比3輸畀利物浦，今仗繼續作客；查實「拖肥糖」近6仗客場聯賽贏得1場，相信今仗唔敢輕舉妄動。翻查紀錄，原來愛華頓近4次聯賽造訪紅魔，當中3次總入球於2球或以下，以主帥朗奴高文咁鬼功利主義，唔會咁傻同你搶攻，既然主隊冇火，客隊又先求穩陣，入球細（2.5球）係最佳選擇。