防線漏水 早段頻失波
西甲爭標形勢緊湊，榜首皇家馬德里同第2嘅巴塞隆拿今晚分途出擊。皇馬目前領先巴塞2分兼少踢1場，掌握冠軍爭奪主導權，不過「銀河艦隊」喺爭冠壓力下近期演出不穩，多次出現早段失波令球隊陷於苦戰，即使倚靠強大火力拎到最後勝利，過程亦絕不輕鬆，今晚主場迎戰近況唔錯嘅艾拉維斯大勝機會唔高，博中位數1.5球嘅半場大更划算。

（now 632周日晚10時15分直播）

皇馬有C朗拿度、賓施馬同加里夫巴利等攻擊好手壓陣，入波從來都唔係問題，可惜球隊後防表現極度不穩，過去10場比賽只係得1仗可能保持清白之身，養傷多時嘅法國中堅華拉尼雖已復操，但未夠狀態正選披甲，今仗仲有巴西防守中場卡斯米路停賽，防線更加令人擔心。

皇馬近期比賽早段極唔集中，近4仗主場有3仗喺上半場已經失球，半場總入球皆達2球，雖然喺呢3場波皇馬最終拎到2勝1和成績，顯示佢哋有足夠火力彌補防線不足，但後面持續「漏水」，皇馬要大炒有一定難度，「銀河艦隊」近8仗聯賽只係得1次贏3球或以上，今仗讓主[-2]太辣，玩半場大更抵。

艾拉維斯慣攞頭威
艾拉維斯近況其實唔差，對上9仗有6勝1和2負，近6仗作客更有4勝1和1負，成隊波目前信心十足，今仗必定會趁皇馬防線不穩主動進擊，如果先拎到入波將令皇馬陷於苦戰。唔好忘記，艾拉維斯近2仗聯賽都係上半場領先下贏波，今仗好大機會繼續爭取「攞頭威」，上半場勢向皇馬搶攻，半場大值博。

巴塞炒得起格蘭納達
皇馬踢完後，緊接周一凌晨輪到巴塞隆拿作客排尾2嘅弱旅CF格蘭納達，雙方實力有一大段距離，近5次交鋒巴塞隆拿全勝之餘，「地上最強」今季聯賽作客下游球隊亦從無留手，每仗至少淨勝3球。如今西甲進入爭標大直路，巴塞勢必全力強攻搶分，推介巴塞隆拿[-2]嘅讓球客勝。

（now 632周一凌晨2時45分直播）