今晚仲有場世盃外亞洲區B組賽事，「2哥」日本作客阿聯酋，日本現時與沙特阿拉伯同得10分，只因得失球不及對手屈居次席，不過今仗對手阿聯酋亦僅落後榜首雙雄1分，如果日本稍有差池，隨時會跌出頭兩名嘅直接出線席位，今仗作客都冇得龜縮，一定會以3分為目標，客Ｗ值得捧場。
（Now 671及FoxSports Play周四晚11時30分直播）
要報首循環輸波之辱
睇番首循環交鋒，「東瀛兵團」喺主場有本田圭佑先開紀錄下，竟被阿聯酋連入2球倒輸1比2，受過教訓今仗不敢再輕敵，希望贏波復仇、直接打擊對手出線機會，戰意必堅，本田圭佑、岡崎慎司、大迫勇也、香川真司及吉田麻也等外流球星悉數歸隊，實力肯定遠勝阿聯酋。
雖然有報道指，日本球迷認為今次大軍平均年齡較高，有8個年齡喺30歲或以上，但其實咁樣顯示，嚟到重要關頭，日本領隊夏利荷錫搵番具經驗球員壓陣搶分，加上日本於今屆6仗世盃外作客豪取5勝1和，今仗客勝有1.75倍不容錯過。
