世盃外南美洲區大戰，阿根廷主場鬥智利，兩軍近2屆美洲國家盃決賽交鋒，阿根廷都因為互射12碼落敗，功虧一簣，球王美斯更因此一度宣布退出國家隊，今仗再遇仇家，肯定搏老命爭勝，挽回面子，讓一球照捧上盤。
（周五早上7時30分開賽，馬會網上文字直播）
阿根廷近6次鬥智利，法定時間90分鐘取得4勝2和，兩場和波就係近2屆美洲盃決賽，痛失兩個冠軍，代價非常大。今場對於阿根廷而言，有兩個重大意義，首先堪稱另一場「決賽」，因為南美洲區前4名直接進身決賽周，第5位需要踢附加賽。咁啱阿根廷現時排第5，落後第4位智利1分，換言之贏波即可超前死敵，肯定當生死戰踢。其次阿根廷上年夏天美洲盃決賽落敗後，球星美斯因為心灰意冷話退出國家隊，雖然之後改口，但智利始終係佢心中一條刺，今場正係省番靚金漆招牌嘅好機會，勢必使出渾身解數，射爆對手。
智利作客腳仔軟
智利同大部分南美隊一樣主強客弱，今屆世盃外，主場曾擊敗巴西、烏拉圭，但作客亦輸畀巴拉圭、厄瓜多爾等實力次一級對手，水準欠穩。射手阿歷斯山齊士上仗英超對西布朗，整傷足踝，一度傳佢會收咧，幸好只係虛驚一場，不過，A山是否恢復十足狀態，實在令人懷疑，加上智利首循環主場都1比2不敵阿根廷，今次作客更加唔樂觀。
