今晚免費台直播重量級國際熱身賽，德國於多蒙特主場西法倫球場迎戰老對手英格蘭，德國足總安排今仗作為「王子」普多斯基嘅國家隊告別戰。兩軍嚟緊周日晚都有世盃外圍賽任務，預期試陣居多，加上「歡送波」因素，競爭性驟降而表演味濃，相信會以一場入球騷送別王子，首選中位數2.5球嘅大盤。

（無綫翡翠台、TVB 13台周四凌晨3時45分直播）

普多斯基曾効力德甲科隆同拜仁慕尼黑多年，亦喺英超阿仙奴度過3個球季，德英兩國大把老友記，今場都會畀面撐場，當中包括喺德軍同佢散發過「Gay味」嘅好拍檔舒韋恩史迪加，仲有阿仙奴同國家隊雙料隊友梅迪薩卡，雖然兩人已退出國家隊唔會落場，不過都會出席佢嘅告別禮，預期雙方落場球員會畀足面主角，等佢盡情發揮。

留力世盃外 狂換試新丁
德英兩軍今次召入咗唔少新丁，德國首次選入RB萊比錫射手迪姆華拿，作為「王子」接班人；而英軍領隊修夫基一口氣召入3名新兵，包括般尼後衞米克堅尼、修咸頓中場列特文同禾特普斯，呢批小將暫時唔會喺世盃外擔任主力，正好借今仗試兵，兩軍對勝負嘅重視程度相對會放得較輕，相信會喺比賽中大量換人留力世盃外。

雙方今仗都有傷兵問題，德軍紐亞、謝路美保定、馬高列奧斯同馬里奧葛斯缺陣；英軍亦冇咗哈利卡尼、朗尼、佐敦軒達臣同禾確特。不過雙方大把人才，德國有普多斯基嘅前阿仙奴隊友奧斯爾回歸，英軍亦有老將迪科爾久別重臨。睇番上次對賽，德國一年前喺柏林主場熱身賽以2比3不敵英軍，今場冇壓力踢「歡送波」，入波又點會少！