自由盃分組賽明早有4場上演，阿King睇中第7組嘅巴甲球隊查比高恩斯主場對阿甲球隊拉魯斯。查比高恩斯近況唔曳，而且主場表現出色，面對流失咗唔少主力兼且近況平平嘅拉魯斯，有力喺自由盃分組賽再下一城，平手盤阿King推介查比高恩斯。

（周五早上6時30分開賽）

查比高恩斯自去年空難後進入重建階段，佢哋獲多支巴甲球隊借出球員，成功組成1支具實力嘅球隊。查比高恩斯自今年1月尾開始參與省聯賽、巴超聯同自由盃3項賽事，14戰取得6勝5和3負嘅戰績，不敗率近8成，而且主場賽事更未嘗敗仗，可見威力甚勁。查比高恩斯上仗分組賽作客2比1贏委內瑞拉球隊蘇利亞，球隊近期入球嚟自3線唔同球員，可見攻擊非常多元化，令對手防不勝防，今場大部分主力都冇受傷患困擾，可強陣出擊。

拉魯斯星級球員、巴拉圭中場米基爾阿米朗轉投美職球隊阿特蘭大聯，令球隊頓時失去重心，雖然引入咗巴拉圭中場馬迪亞斯羅渣士同前獨立隊前鋒丹尼斯，但對球隊整體實力始終有影響。拉魯斯近兩場賽事都輸波，而且1球都入唔到，可見攻不銳守不穩，今仗續有正選門將蒙尼迪因膝部韌帶斷裂要休養，防線岌岌可危，作客更難睇好，平手盤阿King撐主隊查比高恩斯。

山度士玩殘強者
其餘賽事，第5組嘅烏拉圭球隊彭拿路有前鋒桑保斯利上仗領紅牌停賽，主場面對阿甲重開首戰贏波嘅圖庫曼體育會，主隊冇乜優勢可言，捧圖庫曼體育會讓球勝。（周五早上8時開賽）至於第2組嘅巴甲球隊山度士近況雖反覆，但主場表現始終信得過，相反玻利維亞強者作客唔掂，今仗凶多吉少。

（周四早上8時45分開賽、馬會網上文字直播）