今日盃賽當道，阿King推介場次係亞冠Ｈ組分組賽第3輪，日職「2哥」大阪飛腳主場硬撼中超勁旅ＦＣ江蘇。飛腳上輪意外慘敗，今仗實在不容有失，但門神東口順昭證實因傷缺陣之下，隨時以攻代守，面對反擊銳利嘅ＦＣ江蘇，入波唔會少，一於捧大盤（2.5球）。

（Now 672及Fox Sports Play周三晚6時直播）

飛腳首輪輕取阿德萊德聯3蛋後，上輪竟然作客以1比4慘敗畀濟州聯，現時有3分排第3位，爭取2名出線席位不容再失，箭頭艾迪美臣巴拉加近期腳風轉順，連續2仗有士哥，可惜正選門將東口順昭啱啱證實受傷，至少要抖到月尾，被迫以攻代守。暫以6分排Ｈ組榜首嘅ＦＣ江蘇非善男信女，以前車路士中場拉美利斯為首嘅中前場擅打反擊，趁住飛腳谷得咁前，會睇準機會拮你一刀，相信今仗入波必多。

至於夜少少嘅亞冠Ｆ組賽事亦有「中日大戰」，另一支中超上海ＳＰ主場對日職浦和紅鑽，兩隊現時同得6分並列頭兩位，但上海ＳＰ嘅巴西3叉戟侯克、奧斯卡杜斯山度士及艾傑臣火力強勁，而紅鑽近6仗狂轟20球，預計今仗都係鬥攻格局，照捧大盤（2.5球）。最後係聽朝自由盃分組賽第4組次輪，阿根廷聖羅倫素主場出戰巴西帕拉尼恩斯，聖軍今季流失艾曼紐馬斯、卡奧達奧斯奧等多名主力，首輪作客法林明高慘吞4蛋，大跌Watt仲要讓波？寧願捧番受讓嘅帕軍。