近日大家見證過，足球場係充滿奇迹嘅地方，今晚英足盃8強大戰，「奇迹球隊」林肯城作客英超嘅阿仙奴，兩隊波聯賽排名相差89位、球員身價更加係天同地比，不過講到士氣同鬥心，非聯賽球隊林肯城絕對贏晒！立立亂嘅阿仙奴哀兵上陣，要破林肯城銅牆鐵壁冇咁易，3.85倍「半場和」值博。

（LeSports HK應用程式周日凌晨1時30分直播）

近期喺多條戰線失利嘅阿仙奴依家腹背受敵，上輪聯賽作客輸畀利物浦後已跌出前4，周中歐聯恥辱性出局，唔單止球員體力消耗，最慘係士氣嚴重崩潰！睇住球迷不斷抗議要領隊雲格落台，王牌球星阿歷斯山齊士又話同隊友不和，奧斯爾、阿歷士張伯倫又傳唔續約想走，賽前仲爆出病毒危機，消息話奧斯爾病咗幾日之後，又輪到韋碧克同伊禾比感染臥病，軍醫急急將佢哋隔離以免更多人中招。

6萬阿迷隨時倒戈撐客軍
阿仙奴上一圈同樣對住非聯賽球隊瑟頓聯，但只能夠小勝2比0，雖然今仗係主場出擊，但「兵工廠迷」近期大搞遊行示威，球隊由領導層、領隊到球員都成為箭靶，球員喺酋長球場出擊已經唔見得係優勢，反而要承受更大壓力。正如林肯城守將禾達科賽前話：「我知有阿迷想球隊輸波逼雲格走，如果我哋個頭開得好，到時或者有6萬人會撐我哋！」

林肯城係今屆英足盃巨人殺手，對上3圈先後淘汰英冠嘅葉士域治、白禮頓同英超嘅般尼，成為103年來首支殺入8強嘅非聯賽球隊，實力不容小覷。林肯城為今場波非常認真備戰，領隊丹尼高尼更特別向韋斯咸領隊比歷借場，近日拉隊去到「錘仔」嘅訓練場操練。

由於今屆足總盃行新制度，8強開始唔會再有重賽，90分鐘打和就加時同互射12碼，而且加時階段仲可以額外換多1個球員添，林肯城只要守得好呢90分鐘或者120分鐘，就有機會創造奇迹！佢哋周中4比0大勝一仗，近6場比賽有5場保持不失，而且擅長死守，佢哋近4仗英足盃有3仗上半場同對手打和，上半場好氣好力嗰陣，要入佢哋波真係唔易。