法卡奧雷米爭上位
啱啱周日敗走社區盾嘅車路士，今晚回師史丹福橋球場恭候費倫天拿，上演最後一場國冠盃賽事。雖然話英超星期六就開鑼，不過「車長」莫連奴鬥雲格嘅不敗紀錄斷咗纜，家陣肯定成肚火要出吓氣，而且一對箭頭法卡奧、雷米又要為開鑼日正選位置爭崩頭，呢鋪對住「紫百合」肯定把握機會「騷哥利」，撐1.68倍入球大。（有線62、64、202、203及廣東體育周四凌晨3:00直播）

車仔上仗出師不利，0:1輸畀阿仙奴失落社區盾冠軍，「寸王」睇住長年手下敗將雲格反咬佢一口，打破保持咗11年、連續13仗對住莫連奴嘅不勝紀錄，賽後「教授」仲要當「寸王」透明唔握手，試問呢啖氣點吞得落先？可以想像「寸王」有幾想搵「紫百合」做出氣袋。

衰畀雲格 「寸王」成肚火
雖然今仗車仔、費倫無論邊隊贏都捧唔到國冠盃，表面睇係例行公事，不過法卡奧同雷米兩件車仔射手就肯定唔係咁諗，原因係首席箭頭迪亞高哥斯達上周鬥巴塞時受傷，據講連周六嘅英超開鑼戰都趕唔切復出，法卡奧同雷米唔搏盡爭上位就勢係假。

消息指莫連奴今仗會派法卡奧踢正選，雷米就會候命喺下半場搏殺，相信呢兩件上季坐多過踢嘅射手，今鋪肯定使出渾身解數，力求博取寸王歡心，加埋有中場夏薩特、奧斯卡杜斯山度士等好波之人支援，「紫百合」防線好難保得住清白。

費倫天拿上仗以2:1砌低巴塞，小將貝拿迪斯治非常搶鏡，梅開二度成為贏波功臣，加上有基奧斯比羅斯喺最前線攻堅，西班牙翼鋒祖亞昆亦唔係流料，唔難喺近4仗都有失波嘅車仔防線搵到着數，一場入球騷睇怕走唔甩！