美職今季可謂星光熠熠，有多位世界級球星空降，其中巴西名將卡卡就加盟東岸球隊奧蘭多城，不過呢位33歲中場唔知係咪受感情問題影響，近期表現跌Watt，好在球隊有施利拿連大爆發，頻頻入波頂住。奧蘭多城聽朝作客ＦＣ多倫多，睇怕又要靠呢位新星數胡，兩軍近期賽事瘋狂失波，一於博大盤！（TVB 302周四早上8時直播）

施利拿連瘋狂搶胡
卡卡最近再鬧婚變，佢老婆加露蓮日前透過Instagram宣布決定同卡卡結束13年感情，巴西傳媒仲大爆女方堅持離婚帶埋一對仔女返巴西生活，意味卡卡要一支公喺美國捱世界。而卡卡近排正畀呢件事煩緊，表現唔出身價，自從7月初入過一球後，接住6場波都冇再入過波，結果呢位奧蘭多城孭飛球星原本以9個入球位列隊中神射手，依家已經畀隊友施利拿連以10個入球爬頭，呢位20歲小將近兩場夾埋狂轟5粒，腳風順到不得了，但防守一向係奧蘭多城最弱一環，近3場共失10球，真係前面入埋都唔夠後面輸。

對手ＦＣ多倫多同樣識攻唔識守，星級前鋒基奧雲高實力超班，至今喺美職已經入咗13球，唔使擔心唔識入波，但多倫多同樣唔識防守，近6場都開大，一共失咗17球，兩邊都有前冇後，今場識捧梗係捧大盤！