傷鋒兼夾冇鬥心
在武漢舉行嘅東亞錦標賽今日上演「男子組」賽事，由東道主中國火併北韓。國足屋漏偏逢連夜雨，首仗吞南韓兩蛋之餘，射手郜林及中場大腦鄭智勇戰受傷，加上另一主力前鋒楊旭有傷在身，令原本已疲弱嘅攻力雪上加霜。國足更被狠批懶於跑動、缺乏爭標鬥心，情況唔多樂觀。北韓上仗爆冷擊敗日本，拚勁十足，今場有得受讓必揀北韓讓球客勝。（now 633周三晚9時直播）

今屆賽事展開之前，國足已有中場鄒正、于漢超、後衞梅方及姜志鵬因傷退隊，射手楊旭仍然養傷，上仗亦踢唔到。球隊人腳捉襟見肘，搞到鄭智要墮後客串中堅，更不幸嘅係佢同郜林上仗都受傷，就算今場硬頂上，恐怕都會影響發揮。

事實上國足自己亦唔爭氣，上仗表現備受批評，全場6射只有1次中目標，內地傳媒賽後統計，話國足球員跑動距離比南韓少11公里，態度欠積極。出現呢個情況皆因內地球會賽事頻繁，令國腳們疲於奔命，試問疲兵上陣點信得過。

日韓對撼演入球騷
至於北韓雖然冇徵召鄭大世、梁勇基等出名球星，但其他球員將士用命，21歲前鋒朴賢日上場貢獻1次助攻及入1個入球，協助球隊爆冷2比1力挫強敵日本，可見呢支「神秘球隊」臥虎藏龍，絕對唔怕中國隊。

至於早場就嚟個「宿敵對決」，由日本對南韓，日本上仗對北韓開波3分鐘已經打開紀錄，最終輸波似有輕敵之嫌，球隊雖然冇召入一班喺歐洲搵食嘅海外兵團，但仍有宇佐美貴史、山口螢等常規國腳，首仗輸波今場冇得保留，面對死敵一於全力搶攻求打開勝利之門。「太極虎」南韓當然唔會示弱，首輪輕鬆擊敗中國表現對辦，今場兩虎相爭一於捧2.45倍入球大。（now 633周三晚6時20分直播）