有份參戰亞冠盃嘅日職球隊大阪飛腳將於今晚登場，喺主場迎戰日職兩戰全勝嘅FC東京。近期連場征戰嘅飛腳，不但狀態唔及FC東京，而且對賽往績亦處於下風，嚟緊下周中又要喺亞冠盃主場對FC江蘇，班球員心分二用實影響演出，主場根本冇本錢讓波，讓球盤飛腳讓平半，阿謙推介FC東京下盤。

（有線61及201台周六晚6時直播）

飛腳上季聯賽首階段受出戰亞冠盃影響，頭9場聯賽只得4勝5負，當中主場5戰更輸咗4仗，可謂「主場不利」。飛腳今季開咧表現同上季相若，首仗聯賽主場只能1比1打和甲府風林，亞冠盃主場出戰更以1比4慘負南韓球隊濟州聯，對兵源不足嘅飛腳嚟講，要兼顧兩條戰線明顯相當吃力，尤其是由今日起計，飛腳8日內連鬥東京、江蘇同浦和紅鑽，場場硬嘢，呢個「地獄3連戰」好惡啃。

FC東京火力非凡
而且，飛腳最大問題係改打3後衞，門將藤谷陽介，中場主力小將井手口陽介又傷埋，中場掃蕩力減弱，防線極不穩定，何況佢哋近4次喺聯賽對FC東京只得2和2負，即使主帥長谷川健太落咗非勝不可嘅軍令，相信呢個頭關都好難突破。

FC東京上季首、次階段皆排聯賽第9位，成績不過不失，球隊今季重整旗鼓，分別由川崎前鋒、名古屋鯨魚羅致兩大射手大久保嘉人及永井謙佑加盟，中路同左邊攻擊力特強，日前簽埋廣島三箭前鋒彼得烏達卡，令攻擊點更多更廣，更加恐怖。

睇番FC東京開季兩仗分別以1比0擊敗上季冠軍鹿島鹿角，同2比0淨勝升班球隊大宮松鼠，連續兩仗保持零失球，就知佢哋攻守好平衡，今仗雖有中場米本拓司、尾山陽平、平岡翼因傷唔踢得，但影響唔算太大，作客有力反客為主。