熱刺今季主場可謂着晒火，聯賽已取得8連勝，更係英超主場唯一不敗之師，佢哋瘋狂進攻兼壓迫打法，往往令對手有氣冇碇抖，隨住歐洲賽出局，上周中終於冇比賽，令球隊有時間休養生息，今晚主場對愛華頓讓半一，樂比睇好上盤。

（Now 621及LeSports HK應用程式周日晚9時30分直播）

兩軍統帥普捷天奴同朗奴高文有唔少淵源，除咗之前都曾執教修咸頓，兩人最近亦盛傳係下季巴塞教練熱門人選，普捷天奴近年教熱刺成績有目共睹，加上熟悉西甲，本係合適人選，但佢同巴塞非親非故，講「血統」似乎又唔及朗奴高文呢位前巴塞名宿咁純正，不過兩人異口同聲話最緊要教好今季先，講到尾都要今季交到成績先有議價能力。

機動性打法有料到
熱刺暫時落後榜首車路士10分，爭標仍未完全絕望，就算未能後來趕上，都要保住前四歐聯席位，因為其餘幾隊都係落後幾分虎視眈眈，不過樂比就對熱刺充滿信心，因為講球員名氣，熱刺或者唔及其他BIG 6球隊，但講到球員機動性，熱刺就絕對比其他球隊優勝，強如車路士同曼城，作客白鹿徑都捱打輸兩粒，愛華頓要全身而退絕非易事。

事實上，熱刺今季贏嘅就係默契，領隊普捷天奴花咗兩年半時間慢慢執隊波，當中核心陣容並冇大變動，所以今季無論係踢4231或343陣式，球員適應都非常好，而且球員處於當打時期，行軍之迅速及壓迫力之強，往往令對手半場就扯白旗，好似上仗半場已大炒史篤城4比0，下半場直頭練波咁練。

拖肥糖作客差一截
雖然有消息指後衞維頓漢及艾達韋列特均有傷在身，但普捷天奴透露2人傷勢甚輕，仍可以上陣，況且熱刺今季習慣輪換，影響未必太大。愛華頓近期表現不俗，但分數多來自主場，拖肥糖作客白鹿徑已多年未威過，睇怕今場都難翻身！