近排球壇最轟動嘅事，一定係上季帶領李斯特城爆大冷奪得英超冠軍嘅神奇領隊雲尼亞里被「炒魷魚」，再次證明一剎那嘅光輝並唔代表永恒！另一位「雲帥」雲格季季帶領阿仙奴都拎第4，冇乜大突破，今季終被大班廠迷要求佢落台，反對高普嘅聲音都唔少，皆因利記近5場聯賽只贏得1場咁大把，相信兩位名帥為保面子，喺今晚利物浦對阿仙奴嘅大戰中，一定使出渾身解數搶分，入球唔慌少呀，入球大細中位數2.5球，心水推介入球大！

（Now 621及LeSports HK應用程式周日凌晨1時30分直播）

紅軍劫富濟貧衝4 on fire
「紅軍」利物浦最近喺聯賽遇強愈強，遇弱愈弱！對熱刺、車路士、曼聯同曼城等強隊統統搶到分，但往往對弱隊嗰時就失分，名副其實嘅「劫富濟貧」呀！佢哋上場聯賽爆冷以1比3輪畀李斯特城，搞到高普賽後嬲嬲豬，仲警告班球員要醒醒定定，否則就會調動正選名單呀！目標以前4完成今個球季嘅紅軍，暫時喺積分榜排第5位，只落後第4位嘅兵工廠1分，今仗可以話係不容有失呀！相信佢哋今晚一定會on fire搏到盡，攻勢唔會少！

兵工廠蓄銳13日搏甩髀
另邊廂，阿仙奴上一場比賽已經係2月21號對瑟頓聯嘅足總盃比賽，成班球員唞咗10日先嚟到今晚對紅軍嘅大戰呀，佢哋早前仲悶到拉大隊去「碌齡」解悶添呀，似乎對呢場大戰好有信心！不過，廠迷對領隊雲格嘅信心就開始動搖啦，雲帥同兵工廠嘅合約今個夏天就屆滿，雖然佢已經講到明唔會離隊他投，但始終都要交出表現以穩民心，今晚嘅大戰絕對係表演嘅好機會！再加上兩軍相遇，慣性上演「入球騷」，近6次交手，有5次總入球都係3球或以上，預料雙方為搶分爭名次，今場會攜手合演大廝殺，入球大絕對係明智之選。