伐木者季初病發作
新一季美職聽朝開鑼，今季增加2支新球隊，分別係明尼蘇達聯同阿特蘭大聯，球隊總數增至22隊，非常熱鬧。「新丁」明尼蘇達聯率先喺揭幕戰登場，作客波特蘭伐木者。「明聯」首度加入美職，球隊上下充滿期待，鬥心肯定強，隨時帶來驚喜。相反波特蘭伐木者表現慢熱，過去4季首場聯賽只得1勝3和，主場讓波制唔過，寧博明尼蘇達聯讓球客勝。

（TVB 303周六早上10時30分直播）

明尼蘇達聯係美職新丁，亦冇球星助陣，講經驗的確唔及主隊，但勝在教練夏夫有級數，呢位56歲英格蘭名宿，球員時代曾效力史篤城、愛華頓、愛斯賓奴、阿士東維拉、曼城等著名球隊，見慣大場面，正好彌補「明聯」經驗不足嘅弱點。

新丁「明聯」有老江湖掌舵
事實上，夏夫早於9年前已去美國教波，非常熟悉美職情況，佢上季執教奧蘭多城，更以4比1大勝波特蘭伐木者，對於應付伐木者，看來好有計。同埋明尼蘇達聯首次喺美職比賽，對手對佢哋了解有限，比較易製造爆冷賽果，德甲神奇球隊RB萊比錫就係最佳例子，明尼蘇達聯或者可以創造另一個美麗童話。

另一邊廂，波特蘭伐木者上季只係排西岸第7位，冇份踢季後賽，實力好平庸。會方仲不思進取，今季並冇大事增兵，繼續由42歲少帥波特執教。波特喺2013年開始執教伐木者，球隊就患上「季初病」，近4季首場聯賽只有1勝3和，唯一勝仗係上季以2比1險勝哥倫布機員，伐木者以上4仗都係主場比賽，睇得出佢哋就算有地利，都未必有着數，讓波捧對家為妙。