為保前4誓打翻身仗
今晚繼續上演西甲快車，輪到另外兩支勁旅馬德里體育會及西維爾登場。馬體會將作客拉科魯尼亞，佢哋現時已落後榜首雙位數分數，爭標機會非常渺茫，甚至連前4位置都未必保得住，今仗遇上已4連敗嘅護級分子拉科，正係搶分打翻身仗良機，馬體會讓半一都要1.84倍上盤。

（Now 632周五凌晨3時45分直播）

馬體會今季聯賽成績比以往退步，好大程度上因為「遇強即屈」，對巴塞僅1和1負，主場吞皇馬3蛋，仲輸過畀其餘前列球隊西維爾、皇家蘇斯達及維拉利爾，搞到依家大落後，已經畀排第5皇家蘇斯達追至同分，連「前4」席位都唔穩陣。不過「床單兵團」對中下游球隊仍然甚有把握，上仗不敵巴塞1比2之前，一度取得聯賽6勝2和佳績，今場要贏為護級而掙扎嘅拉科並唔難，皆因拉科衰到貼地，聯賽已經4連敗，最離譜係上仗以0比4大敗畀另一支護級球隊雷加利斯，今仗由新帥梅爾首場領軍即喺主場遇上馬體會，就算有地利隨時輸得更慘。

西維爾遇「剋星」做大騷
另一場「三哥」西維爾主場對畢爾包，西維爾今季表現大勇，近10場聯賽取得8勝1和1負漂亮走勢，包括主場以2比1贏過皇馬，所以踢到依家仲可以同皇馬及巴塞分數上咬得好緊，甚至有機會後來居上捧盃，但前題當然係做好本分應贏則贏。計埋盃賽，西維爾近8仗主場獲6勝2和共轟入24球，換言之平均每場入到3球，睇得出火力相當強橫。

不過「巴斯克雄師」畢爾包係西維爾嘅「剋星」，近4次對賽畢爾包取得3勝1負，包括近兩次都以3比1勝出，心理佔優下，今仗就算唔贏都應該入到波。事實上兩隊近4次交手，總入球都達3球或以上，中位數2.5球嘅入球大，有1.68倍分頭算係唔錯選擇。

（Now 633周五凌晨4時30分直播）