F組雙雄贏開繼續贏
亞冠盃Ｆ組今晚上演第二輪分組賽，兩支首輪作客贏波嘅球隊浦和紅鑽、上海ＳＰ齊齊返回主場出戰。紅鑽迎戰近年患上「作客恐日症」嘅ＦＣ首爾，小讓平半上盤抵玩（Now 670、Fox Sports Play周二晚6時30分直播）至於上海ＳＰ上屆打入亞冠盃8強全憑超強主場表現，6仗主場取得5勝1和，面對西悉尼流浪者可熱捧「讓主」。

（Now 671、Fox Sports Play周二晚７時30分直播）

ＦＣ首爾患「作客恐日症」
上季日職亞軍浦和紅鑽今屆陣容變動唔大，故此開咧冇耐已迅速入局，雖然佢哋先後喺日超盃及聯賽以同樣比數2比3輸畀鹿島鹿角及橫濱水手，不過連同首仗亞冠盃分組賽作客4比0大勝西悉尼流浪者，紅鑽近3仗比賽一共轟入8球，進攻火力全開。相比之下新一季韓職尚未開鑼，ＦＣ首爾狀態明顯較差，前鋒丹恩奴域上仗連12碼都唔入，結果令球隊喺主場0比1輸畀上海ＳＰ，最慘係ＦＣ首爾近年喺亞冠盃作客日職球隊都冇運行，對上3次全部輸晒，包括上屆16強首回合輸畀今場對手紅鑽，今次再訪凶地難睇好。

上海強兵恰西悉尼
同組中超球隊上海ＳＰ主場迎戰澳職西悉尼流浪者。上海ＳＰ今季來勢洶洶，除由葡超名帥保亞斯領軍，仲以高價購入巴西中場奧斯卡杜斯山度士，配合上季尾加盟嘅鋒將侯克、以及曾幫廣州恒大兩度贏過亞冠盃嘅艾傑臣，力足威脅恒大嘅擂台躉位置。上海ＳＰ係上屆亞冠盃8強分子，由外圍賽開始至淘汰賽，佢哋上屆踢咗6場主場比賽攞到5勝1和，水準穩定，今屆首次喺主場出擊，想贏近期疲態畢露嘅西悉尼冇難度。