蒙通聯鹿角吼半和
 
另一組Ｅ組亦上演兩場分組賽，日職冠軍鹿島鹿角作客曼谷蘇帕查拉賽體育場鬥泰超球隊蒙通聯。今仗係鹿角11日內第4仗正式比賽，鹿角上仗日職開鑼戰以0:1不敵ＦＣ東京，球員開始有疲態，估計作客出戰唔會過分冒進。至於蒙通聯被視為此組陪跑分子，主場出擊亦冇本錢搶先機，首選半場和。

（Now 670、Fox Sports Play周二晚8時30分直播）

上季日職總冠軍鹿島鹿角季初賽程排到密麻麻，由日本超級盃起計，今係已經係鹿角11日內第4仗比賽，頭2仗鹿角係威係勢，先喺日超盃以3:2擊敗浦和紅鑽，然後亞冠盃首輪分組賽亦以2:0擊敗蔚山現代，點知上周末日職開鑼戰主場對ＦＣ東京走晒樣，幾乎全場被壓住嚟打，結果最終以0:1落敗，球員表現開始有疲態，今場佢哋又要飛往泰國出戰，睇怕都好難喺初段攞到甜頭。

蒙通聯相隔4年再度出戰亞冠盃分組賽，實力、經驗都唔夠，早被視為陪跑分子，不過球隊上仗作客能以0:0悶和澳職球隊布里斯班獅吼，防守做得唔錯，喺主場球迷打氣之下有力踢高一班波，推介半場和。

現代獅吼入波唔慌多
另一場Ｅ組由南韓代表蔚山現代主場鬥澳職布里斯班獅吼，兩軍首輪分組賽都入唔到波，攻力麻麻，預計今仗入波唔會多，中位數2.5球嘅細盤博得過。

（Now 672、Fox Sports Play周二晚6時30分直播）