禾路有貨交華倫快車掃雷

西甲周中加開快車，搵番禾路（圖）坐正執教嘅華倫西亞，終於有起色，早前更於主場擊敗皇馬，最令人驚喜係1月加盟嘅「失意軍人」施蒙尼沙薩，都有神來之筆，屢建奇功。華倫西亞今仗主場對雷加利斯，贏面相當大，捧主勝。

（Now 633周三凌晨4時30分直播）

華倫西亞季初解僱主帥阿耶斯塔蘭，由助教禾路暫時領軍，立即連贏2場，包括擊敗雷加利斯。不過會方喜愛名牌，聘請前意大利國家隊領隊柏蘭迪利執教，成績反而走下坡。結果上年年尾，都係炒咗柏蘭迪利，並正式由禾路擔任主帥。呢位53歲教練唔止係華倫名宿，仲喺華倫教練團工作多年，非常熟悉隊內情況，由佢接手領軍，自然可以對症下藥，改善問題。

華倫表現亦愈來愈好，尤其係近4場聯賽主場贏咗3場，包括以2比1擊敗皇馬，施蒙尼沙薩射入1球世界波，令人拍案叫絕。呢位25歲意大利國腳上年歐國盃8強對德國，以「碎步」助跑射失12碼出醜，跟住被祖記外借去韋斯咸，踢咗半季都冇波入，上月轉戰西甲獲得重生。華倫近兩場聯賽主場贏波，施蒙尼沙薩都有波入，上仗作客輸畀艾拉維斯後，今仗返回自己地頭，應該可以反彈。

雷加利斯作客唔夠砌
雷加利斯今季升上西甲，明顯未夠班，現時已捲入降班漩渦。加上以佢哋近8場聯賽作客2和6負劣績，更加無力喺華倫身上搶分，可以繼續反。