西甲今晚上演重量級大戰，「二哥」巴塞隆拿將作客勁旅馬德里體育會。馬體會近期狀態回勇，相反巴塞自歐聯慘敗後氣勢全滅，後防甩甩漏漏，盛傳陣營內更為教練安歷基去留爆衝突，士氣差成咁點讓波？馬體會受讓平半，必撐下盤！（Now 632周日晚11時15分直播）

巴塞喺歐聯16強首回合慘吞巴黎聖日耳門4蛋，晉級極為渺茫，教練安歷基成「箭靶」，有傳美斯為首嘅外籍兵團希望踢走佢，但碧基帶頭嘅西班牙幫就撐安帥，搞到出現分裂。唔理傳聞係真係假，呢啲消息都肯定影響更衣室士氣，上仗聯賽對住弱旅雷加利斯亦只靠爭議12碼完場前絕殺，完全冇霸氣。

後防甩漏未解決
事實上巴塞後防問題經過半季未解決，右閘阿歷斯維度重傷收咧後，改用沙治羅拔圖更加不穩，經常畀對手針對性打爆，馬菲奧、烏姆迪迪同迪卡斯迪治尼3位法國守將表現平庸，同前場嘅星光熠熠反差極大，防守差影響埋全隊信心，結果愈踢愈頹。

馬德里體育會目前排聯賽第4位，仍要為力保來季歐聯資格而努力，佢哋近期狀態回復水準，近8仗聯賽拎到6勝2和不敗佳績，上周中歐聯16強首回合作客4比2擊敗利華古遜顯示強大攻力，鬥駁火都唔赦巴塞，受讓平半真係值得支持。