今晚除咗英聯盃決賽同西甲馬體會鬥巴塞之外，仲有唔少大戰，當中意甲上演國際米蘭主場對羅馬。國米上年11月由皮奧利執教後，愈戰愈勇，近10場聯賽贏咗9場，首席射手莫路伊卡迪坐完波監復出，更係一大喜訊。羅馬上仗歐霸盃收起迪斯高、穆罕默德沙拿等主力，擺明留力今仗，雙方勢演對攻大戰，捧中位數2.5球入球大。（TVB 302周一凌晨3時45分直播）

莫路伊卡迪月初對祖雲達斯，因侮辱球證被罰停賽2場，搞到國米近2場僅小勝安玻里同博洛尼亞。莫路伊卡迪今仗復出，情況肯定有大改變，佢今季聯賽轟入15球，佔球隊近4成入波，國米有番呢位24歲阿根廷射手助陣，火力肯定大大提升，可放膽主動出擊搶3分。不過國米中堅祖奧米蘭達停賽，防線有隱憂，未必保得住清白之身。

羅馬今季意甲平均每場入多過2球，皆因前鋒迪斯高大勇，已有19球進帳，穆罕默德沙拿、尼恩高蘭、柏洛迪3人加埋亦貢獻咗22球，大把數胡高手。羅馬近5次作客國米，取得3勝2負，並唔輸蝕，其中4場總入球達3球或以上，大盤值博。

法甲國家打吡撐PSG
法甲上演「國家打吡」馬賽主場對巴黎聖日耳門（PSG），聖日耳門近4次作客馬賽全勝，客Ｗ可追。（TVB 303周一凌晨4時直播）尾關葡超波圖上仗歐聯踢咗27場分鐘，就有左閘阿歷士迪尼斯被逐，搞到大部分時間踢少1人，消耗大量體力，仲輸波收場，身心受挫，今晚作客難炒博維斯塔，寧揀入球細。（有線155台周一凌晨4時15分直播）