英格蘭本土首個盃賽決賽今晚上演，由曼聯於溫布萊球場同修咸頓爭冠軍。好多人以為莫連奴決賽一定會踢得孤寒，呢個係以前嘅事，「寸王」手上大把進攻能手可用，今季季初社區盾紅魔鬼就以2比1擊敗李斯特城，伊巴謙莫域更加係盃賽入波王，今季為曼聯喺各項盃賽上陣12次入9球，唔怕冇波入。修咸頓為爭盃亦冇唔會龜縮，一於放手一博，中位數2.5球入球大絕對係明智之選！（有線61及201台周一凌晨零時30分直播）
曼聯家陣行緊條盃賽3冠路，如果要計埋聯賽爭前4，同時應付4條戰線添。球隊喺歐霸盃淘汰聖伊天，順利晉級16強，而喺英足盃8強賽事就將會作客車路士，相信要晉級都唔係容易呀，咁今晚就率先喺英聯盃攞個盃仔先啦，好彩「寸王」手上有大把Goal手，逐個發功Keep到個勢。
最近曼聯陣中表現最搶眼嘅，一定係近6場比賽攻入3球，兼交出2個靚助攻嘅米希達利恩喇，雖然佢上周中歐霸盃臨完上半場前拉傷大腿傷出，但似乎冇影響領隊莫連奴嘅心情呀，曼聯贏波之後就拿拿聲返英國，吸引唔少魔迷喺機場等大軍返嚟，「寸王」竟然將自己喺機上用過、印有曼聯隊徽嘅旅行枕，送畀1位小球迷。梗係啦，曼聯仲有大把貨，淨係一個伊巴謙莫域都夠喺今場英聯盃決賽發威。
戰神伊巴盃賽12戰入9球
伊巴今季為曼聯上陣37場入24球，如果只計盃賽，出戰12場入9球，再收窄範圍至本土盃賽，「戰神」披甲6場入4粒，可見佢喺盃賽上陣真係好醒神，而且佢對修咸頓特別有計，季初聯賽就包辦2粒，助紅魔以2比0贏波，今場又可以睇佢表演。
修咸頓主力中堅要長抖
另邊廂，修咸頓嘅華基爾雲迪積克早前喺對李斯特城場波整親足踝，要休息2至3個月，今晚無緣披甲，對「聖人」一定有影響！話晒呢位25歲荷蘭中堅自荷西方迪離隊之後，佢喺防線嘅地位就愈嚟愈重要，雖然球隊最近正式簽咗自由身嘅前祖雲達斯後衞馬田卡沙利斯，以解決中堅荒問題，不過初嚟甫到，要同球隊建立默契都唔係一時三刻就做到嘅事，防線有暗湧，不如同曼聯鬥攻好過，除咗今季聯賽食蛋，其實修咸頓之前5次對曼聯都能夠取得入球，相信今晚兩隊為咗爭奪英聯盃錦標，一定會全力開火，入球唔慌少，心水推介入球大。
