又頹又傷亞冠迎飛腳
亞洲、歐洲、美洲盃賽由今午玩到聽朝，激戰連場！阿King精選一條「越洋」3串1過關，頭關係亞冠盃H組，阿德萊德聯主場對大阪飛腳。上季澳職總冠軍阿德萊德聯今季走晒樣，淪為包尾大幡，20場聯賽只入16球，攻力極弱。至於大阪飛腳因為日職未開季，狀態成疑，首選中位數2.5球嘅入球細。

（Now 672及Fox Sports Play周三下午5時直播）

阿德萊德聯今季成績倒退，好大程度上因為長期受傷兵問題困擾，首席門將兼隊長加利高域、後衞佐敦艾斯、中場拿洛卡、賴恩基圖都受傷缺陣。巧婦難為無米之炊，教練阿摩唯有改變踢法，以控球在腳拖延時間，遮掩後防漏洞，連帶進攻機會亦下降，近9場比賽5場冇波入，今場轉戰水準更高嘅亞冠盃，想入波就更難。

大阪飛腳隊長兼中場大腦遠藤保仁已年屆37歲，水平漸走下坡，同埋日職未開咧，球員未必有十足狀態。加上大阪飛腳近4次亞冠盃對阿德萊德聯，總入球都係2球或以下，入球細值得再追。

歐霸史浩克再開「P」
歐霸盃32強次回合，德甲史浩克04主場對希臘球隊PAOK，史浩克04首回合大勝3比0，可見雙方實力懸殊，更何況史軍今仗仲有地利，有力再炒多對手一鑊，直取讓球主勝。

（Fox Sports Play周四凌晨1時直播）

最後南美自由盃第3圈外圍賽次回合，巴拉圭球隊奧林比亞會首回合作客僅輸0比1，今仗返回主場再鬥巴西球隊保地花高，必然主攻求收復失地。奧林比亞會近8次主場取得7勝1和，可望贏波翻身。

（周四早上8時45分開賽）