兩大門神坐鎮 零封冇難度
歐聯經典重現！今晚16強首回合波圖主場對祖雲達斯，雙方老牌門將卡斯拿斯及保方正面交鋒，又可以令球迷緬懷一番兩位昔日首席門神之爭美好光景。卡斯拿斯離開皇馬後一度跌落谷底，但今季重生成為歐洲主要聯賽失波率最低門將；保方一直保持巔峰，等閒之輩極難攻破其十指關。兩大門神把守最後一道防線，兩隊想入波都難，細盤嫌冇肉食，建議博1.85倍嘅半場和。

（有線62及202台周四凌晨3時45分直播）

卡斯拿斯谷底反彈
35歲嘅卡斯拿斯兩年前離開母會皇馬，加盟波圖成為事業走下坡分水嶺，特別係上季多次犯錯，一度被睇死連葡超都踢唔掂，西班牙國家隊首席門將之位亦被迪基亞取代。諸事不順下，卡斯拿斯沉着應戰，今季終於大翻身，波圖今季喺「聖卡斯」把關下，22場聯賽僅失11球，成為英、西、德、意、法、葡歐洲主要聯賽，失波最少球隊。西班牙《馬卡報》都大讚卡斯拿斯仍然係世界最佳，呼籲西班牙主帥洛佩特吉重召佢入國家隊。

39歲保方身手依然
39歲保方仲犀利，仍然穩坐祖雲達斯及意大利國家隊正選，超然地位無可代替。祖記由佢把關，今屆6場歐聯分組賽只失兩球，同馬體會並列最佳防守球隊。保方同卡斯拿斯最令人津津樂道係國際賽舞台合演「零封」好戲，2008年歐國盃8強，意西激戰120分鐘仍然打和0比0；到2013年洲際國家盃4強，同樣互交白卷，更加要射到第7輪12碼先分出勝負。

即使波圖近期6連勝狂轟17球，祖雲達斯亦豪取7連勝，雙方前線同處強勢理應駁火格局，但今場中位數2.5球嘅入球細熱到得1.46倍，反映兩大鋼門在陣，令「零封」機會急升。加上屬首回合賽事，大家上半場都會試探虛實為主，隨時互無紀錄，半場和有1.85倍絕對抵玩。