今輪德甲壓軸戲上演中游對決，科隆主場迎戰史浩克04，科隆德甲主場夠硬淨，不過本身質素高唔得過對手，球隊狀態下滑加上傷兵滿營，今晚唔易頂得住弗爆嘅史浩克來犯，史浩克受讓平半必捧下盤，貪心啲捧埋2.9倍客W都唔過分。（Now 670、有線61及201台周一凌晨零時30分直播）

科隆7將缺陣中場散晒
科隆自去年4月至今，德甲主場已保持6勝5和不敗佳績，球隊今季整體表現亦交足貨有餘，不過踏入2月份確有回落迹象，近期於德國盃同德甲先後輸畀漢堡同弗賴堡，雖然呢兩場波都係作客，但計主場近4場聯賽亦只得1勝，明顯遠遜季初，主要原因係受傷兵問題困擾，中場大將比頓確特啱啱喺對弗賴堡一役末段傷出，今仗要倦勤，令佢哋傷兵名單累積到7人，中場更係重災區，養傷主力仲包括馬高賀查、馬菲亞斯列文同馬素懷斯，加上門將漢恩同兩名鋒將古拉斯、魯特尼夫斯都未踢得，一隊球員得番17個可用，中場戰鬥力尤其削弱，即使箭頭莫迪斯迪當弗，喺供應不足下亦感孤掌難鳴。

兩新兵幫史浩克升呢
另一邊廂，史浩克經過最差開局後，季中已重返正軌，歇完冬更明顯愈戰愈勇，近期3線作戰全勝共轟入9球，兩位新加盟嘅攻擊手古多貝斯托拿同卡利古尼迅速融入球隊，表現出色仲不斷入波，令球隊前線升晒呢！最令人欣慰嘅仲係王牌射手亨特拉爾，經過近4個月養傷後終於徹底康復同重拾狀態，上周中歐霸盃後備入替取得個人第50個歐洲賽入球，成為史上第16位達到呢個成就嘅球員，呢位領袖人物回勇，對全隊士氣係一大鼓舞。

史浩克去年3月作客曾經以3比1打爆科隆，當時首開紀錄嘅正係亨特拉爾。事實上雙方近年交手，都係作客一方成績佔優，以科隆目前傷兵情況，根本讓唔起史浩克波。