澳職今日上演獨腳戲，由中岸水手喺主場迎戰墨爾本勝利。水手近期頻頻贏波逐漸走出低谷，球隊仍有機會搭上季後賽尾班車，未來賽事一定會踢得更進取力爭贏波3分；加上上次造訪勝利慘輸1比4，今仗回師主場當然希望復仇。至於勝利近況平穩，球隊雖然排積分榜第2但未可安枕，現時同樣有贏波嘅需要。兩隊今仗勢必對攻力求贏波，入球大細中位數去到3.5球都照捧大盤！（周日下午2時開賽）

水手開季表現低迷，但近期表現已有改善，最近更連贏3場，現時雖然排緊積分榜第9位，但只落後第6嘅西悉尼流浪者2分，要趕上季後賽尾班車仍未絕望，球隊喺餘下嘅賽事應會全力爭勝，以出戰季後賽為目標。水手中場法比奧費拉拿同前鋒奧當路雲近期都有波入，兩人狀態都唔錯，雖然中場尼基蒙哥馬利今仗因黃牌夠數停賽，但球隊都會全力搶攻力爭贏波3分；再加上水手上場作客勝利被大炒1比4，今次返到主場自然希望復仇，肯定會踢得更積極同進取。

3.5球大盤捧得落
勝利經歷早前3連敗後，球隊近兩仗取得1勝1和似乎已經穩定落嚟。勝利目前喺積分榜排第2，落後榜首嘅FC悉尼11分，要爭奪常規賽冠軍都幾渺茫，但由於只領先第3位嘅布里斯班獅吼7分，如果有咩差池隨時唔能夠以聯賽第2名身份踢季後賽，影響非常之大，所以絕對有贏波嘅動力。勝利陣中現時冇任何主力受傷，可以強陣出擊，包括上仗大炒水手時梅開二度嘅馬高洛查士，今仗面對志切贏波嘅水手有望再演入球騷，阿謙推介大細中位數3.5球嘅大盤。