黑柴偏愛德國波，無論國家隊定聯賽，球員定教練，佢哋都好務實咁追求卓越，致力做好青訓工作，埋頭苦幹一定有收成。睇番英超同中超呢啲聯賽，一味靠金錢堆砌，花幾多錢都買唔到好表現同成績。君不見好似哥迪奧拿同每況愈下嘅莫連奴等名帥，攞住世界頂級薪酬，每次轉會窗總有驚世瘋狂收購，但交出嚟嘅表現同成績總令人失望，佢哋帶嘅球隊仲經常因為個人偏好，多年來浪費同埋沒無數優秀球員。

德甲名帥唔多，只有拜仁堅持追求名牌，其餘球隊近年大量起用自身提拔嘅青年軍教頭，單計近5個球季，18支德甲球隊已經有12隊用緊自己栽培嘅主帥，年輕教練除咗帶嚟年輕思維之外，亦更切合德甲嘅經濟踏實風格，大部分都喜歡提拔年輕球員。當中賀芬咸少帥拿高斯文，29歲仔已經脫穎而出成為炙手可熱教練，仲擅長唔使錢辦大事，難怪已經受到好多大球會青睞。

賀芬咸季半前已經部署扶正呢位青年軍教頭，上季球隊一度跌到排尾二護級告急，終於決定畀機會佢，結果喺最後14輪聯賽贏得7仗，護級成功。今季拿高斯文仲嚟個大突破，帶領嘅賀芬咸成為歐洲各大頂級聯賽最遲輸波嘅球隊，至今只係輸過1場。更重要係拿高斯文根本唔需要花錢，去年夏天球隊賣走主力禾蘭畀利華古遜，佢只花禾蘭嘅一半轉會費，買斷由李斯特城借用嘅前鋒卡拉馬歷。到咗冬季轉會，賀芬咸出售咗伊度亞度華加斯同金珍洙，亦放走瑞典中場謝路安夏馬特，但拿高斯文只係喺青年隊提升兩名新秀上一隊補充，球會庫房有入冇出，但表現同成績依然保持，唔到哥帥莫帥呢啲大老爺唔汗顏！

禾夫斯堡防線唔齊人
拿高斯文以戰術多變見稱，擅長鼓勵球員，因材施教令佢哋盡展所長，球隊上輪大炒硬淨嘅緬恩斯4蛋，除咗箭頭烏夫愈戰愈勇外，連後備攻擊手施沙拉爾同泰拿仙奴都有波入，今晚作客面對仍在重建中，有主力守將謝菲布馬停賽，防中古拿禾古受傷嘅禾夫斯堡，可以繼續穩中求勝，平手盤要追賀芬咸。（Now 670、有線61及201台周日晚10時30分直播）