3大洲盃賽晚飯爽到食早餐
3大洲盃賽激戰連場，由夜晚亞洲聯賽冠軍盃開始，直落德國盃、西班牙盃同南美自由盃，砌到第2日朝早。重頭戲當然數今晚食飯時間嘅亞冠盃第3圈外圍賽，由FC上海迎戰布里斯班獅吼；FC上海有全球最高薪球星泰維斯首度上陣，同馬田斯組成星級鋒線，對住疲兵獅吼贏面高，1.59倍主勝值博。

（now 670及FSP周三晚7時45分直播）

FC上海（上海申花綠地）陣容鼎盛，由於亞冠盃只可用3名外援加1位亞援，所以FC上海教練普耶起用泰維斯、馬田斯同哥倫比亞中場祖雲尼摩蘭奴，另一星級中場古亞連要忍痛讓位，就知佢哋兵力有幾強。今仗係泰維斯登陸後首場正式比賽，早前熱身賽對同樣嚟自澳洲嘅悉尼聯隊，就係泰維斯同馬田斯包辦3個入波贏3比0。

德國盃多蒙特有鑊氣
布里斯班獅吼本身實力唔差，不過佢哋近期賽程密到你唔信，今仗係球隊12日內第4場比賽，踢完呢場波又要飛返澳洲準備3日後踢聯賽。教練艾萊斯已經表明會畀部分主力休息，包括正選門將迪奧列托斯肯定唔會隨隊去中國，可見獅吼爭勝決心並非十足，要頂住FC上海有難度。

去到凌晨時分，上演德盃16強多蒙特主場火併哈化柏林，客隊近期表現回落，作客兩連敗，多蒙特喺奧巴美揚回歸後火力回復，作客腳軟嘅哈化難攖其鋒，讓球主勝值博。

（TVB 13周四凌晨3時45分直播）

自由盃高路高路要復仇
至於聽朝就有南美自由盃第2圈外圍賽，焦點係兩支老牌球隊交鋒，智利班霸高路高路主場對巴西勁旅保地花高。高路高路雖然首回合輸1比2，但有作客入球在手，加上佢哋近8次主場取得7勝1和，有力收復失地反勝晉級，捧主勝。

（周四早上7時45分開賽）