「肥賓」力捧唔衰得
奧迪盃呢項兩年一度嘅重量級熱身賽，今晚會喺安聯球場揭開戰幔，頭場由皇馬火併熱刺。今仗焦點所在，梗係加里夫巴利首次倒戈熱刺！「大聖爺」得到主帥賓尼迪斯力捧，就連占士洛迪古斯同艾斯高都要「靠邊站」，今場面對連「雜牌軍」美職明星隊都輸得嘅熱刺，當然要趁機騷哥利，1.73倍「讓球主勝」撐得過。 （有線61、64、201及203周三凌晨0:15直播）

「肥賓」自從坐正做「艦長」後，即使「艦迷」強烈反對，仍然一意孤行搵加里夫巴利擔正進攻中場，明顯想將佢打造成為新進攻核心。可惜巴利喺早前兩站國冠盃唔多生性，只得一次助攻咁大把，相反畀佢逼到「靠邊站」嘅艾斯高同占士洛迪古斯，就分別交出兩次助攻同一個世界級靚絕罰球，「大聖爺」今場倒戈舊東家，唔做番齣好戲點得先？

熱刺未上力唔夠揪
再講吖，除咗被迫移到邊路搵食嘅艾斯高、占士仔為博取「肥賓」歡心而竭盡所能，要爭奪中堅正選位置嘅比比同華拉尼，同埋爭做正選右閘嘅丹尼爾卡華積、丹尼路達施華，喺前排國冠盃落到場完全唔敢揸流攤，守到對方鋒將冇啖好食，4場波對住羅馬、曼城同米蘭雙雄夾埋只失過1球，今場要阻擋熱刺來襲冇難度啦！

對手熱刺雖然上個月頭已經開操，可惜佢哋日前造訪缺少謝拉特、羅比堅尼、林柏特呢啲大牌球星嘅美職明星隊，竟然喺3分鐘內連失兩球，就算大部分時間控制戰局，亦只能夠靠前鋒哈利卡尼破蛋攞番些少面子，成班波明顯未上力，今場對住磨刀霍霍嘅「銀河艦隊」聽做炮灰！