魯賓卡山傷停分心歐霸
今晚賽事唔算多，阿King重心推介一場俄超莫斯科斯巴達主場對魯賓卡山，主勝可取。魯賓卡山近期受內外不利因素夾擊，防線主力索羅門卡域維利亞停賽，中場梅巴拉克感染瘧疾缺陣，加埋周中要分身應付歐霸盃，球員疲於奔命。莫斯科斯巴達以逸待勞，主W有1.72倍抵玩。

（周二凌晨零時開賽）

莫斯科斯巴達今季搵來名宿阿倫尼切夫執教，呢位42歲少帥球員時代曾經協助斯巴達3奪俄超冠軍，亦為波圖捧過歐聯，喺俄國球壇擁有崇高地位。即使佢教波經驗尚淺，但仍可憑個人魅力激勵軍心，聯賽開鑼後兩戰1勝1和證明有料到。

相反客軍魯賓卡山兩場聯賽輸晒兼冇波入，球隊上周中歐霸盃第3圈外圍賽首回合，險勝奧地利球隊格拉茨3比2，嚟緊周中次回合主場再戰並唔易踢。最大鑊係兩位主力索羅門卡域維利亞及梅巴拉克同時缺陣，面對頻密賽程恐怕頂唔住。

ＲＢ萊比錫南錫串Ｗ
另外兩場推介，德乙ＲＢ萊比錫主場對格雷特霍夫，主隊今季大舉增兵，上仗就派出5位新簽球員上陣，其中沙比亞更取得入球。格雷特霍夫嘅港產球員林志堅受傷缺陣，難擋ＲＢ萊比錫強勢。最後法乙南錫主場對杜亞斯，杜亞斯兩位射手蘭尼薩耶莫及安迪迪洛特已經離隊，實力明顯受削，捧南錫比較穩陣。