話咁快英超踢咗一半有多，呢個時候前列分子正為爭標奮力作戰；榜尾球隊則要護級搶得就搶。至於「紅魔鬼」曼聯就要為重奪歐聯參賽資格而搏命，今晚佢哋出征對今季表現失色嘅李斯特城，仲唔乘機踩多腳攞足3分？「讓球盤」曼聯讓半一，上盤必撐呀！(Now 621、LeSports HK應用程式周一凌晨零時直播)

曾經帶領其他球隊兩奪歐聯嘅曼聯領隊莫連奴早前發表「愛的宣言」，講到明對呢項歐洲球會級至高榮譽念念不忘，好希望可以帶領紅魔鬼參戰來屆歐聯。球隊要拎到歐聯入場劵有兩個方法，一係贏得歐霸盃，一係打入前4，不過兩條路都唔係易行。曼聯上周中聯賽對侯城一仗中，竟倒灶悶和0比0，錯過追近前4嘅機會。

出賣烏路亞 李城士氣曳
「寸王」喺賽後記者會更大發雷霆，指摘球證故意針對自己，又發炮攻擊記者無知！相信曼聯今仗遇上表現麻麻嘅李斯特城，莫帥一定會下「格殺令」，要求班球員打醒十二分精神，大炒對手重返勝軌。

另邊廂，上季英超冠軍李斯特城今季表現判若兩隊，最近聯賽更3連敗，對般尼同修咸頓都毫無還擊之力，搞到捧蛋。「李城」除咗狀態低迷，士氣亦都唔好得去邊。事關上季以後備身份屢建奇功、為球隊爆大冷贏得聯賽冠軍嘅功臣之一荷西烏路亞，最近更爆出被領隊雲尼亞里出賣，揚言唔會再為球隊披甲，擺明不惜入雪櫃都唔怕，更衣室內氣氛難免受到影響。就算今晚佢哋有主場之利兼且受讓半一，但對住近月狀態理想嘅曼聯真係未必夠踢，心水推介上盤！