上輪被誤判 失分一肚氣
西甲今晚上演前列大戰，上周慘情失分嘅巴塞隆拿，會喺主場迎戰畢爾包。巴塞目前被皇家馬德里拋離4分兼多踢1仗，爭標形勢惡劣，要保住後上機會，餘下賽事每場均不容有失。巴塞上仗聯賽因被誤判失分而谷埋「一肚氣」，就算周中西班牙盃作客馬德里體育會贏波，今仗都會繼續盡情搶攻，魯營球場近期霸氣逼人，讓球主客和巴塞讓兩球都照捧讓球主勝。

巴塞隆拿上仗作客逼和貝迪斯1比1，但球隊有一個明顯入球被誤判取消而痛失寶貴2分，巴西前鋒尼馬同教練安歷基等賽後齊齊炮轟球證嘅執法。不過，分數已經唔能夠追番，佢哋只能寄望喺之後嘅比賽加倍努力搶分。巴塞周中西班牙盃作客馬體會贏波，證明球隊已經重拾信心，今仗迎戰畢爾包正是一眾球星繼續表演嘅大好機會。

魯營球場一直是巴塞嘅福地，球隊近期主場出擊氣勢強勁，對上6仗主場賽事錄得全勝。除咗早前西班牙盃對畢爾包只係贏兩球外，其餘5仗均以3球或以上嘅優勢大勝，每場比賽都至少轟入對手3球，火力相當驚人，今仗重返魯營球場出擊殺聲震天，可以話係大勝在望。

畢爾包陣容殘作客曳
畢爾包目前雖然排喺聯賽第7位，但球隊向來靠主場搶分，作客成績就不敢恭維，對上10場作客賽事只係贏過1仗，所贏嘅對手只係低組別球隊桑坦德。畢爾包今場有中場艾基迪斯同後衞艾斯達受傷未能候命，戰鬥力再受削弱，造訪魯營球場可以話係凶多吉少。

（Now 632周六晚11時15分直播）