格雷特霍夫殘陣冇士氣
今晚阿King將注意力放喺德乙度，希望初七「人日」送份禮物畀各位。格雷特霍夫歇冬後首仗喺打吡戰輸波，球隊士氣大受影響，加上傷停情況嚴重，今晚主場對住實力強勁嘅「一哥」漢諾威冇運行，讓球盤漢諾威讓平半，阿King推介上盤。

（有線64及203周六凌晨1時30分直播）

格雷特霍夫剛喺上周嘅「巴伐利亞打吡」以1比2不敵1860慕尼黑，球隊士氣受到嚴重打擊，更悲情嘅係新簽番嚟嘅後衞史提芬森馬上仗首度披甲即做「紅牌阿姑」，今仗需要坐波監。除史提芬森馬外，格軍前鋒維頓貝利沙、查碧及中場沙拉亞均上陣成疑，至於創造力十足嘅中場加素拿亦肯定缺陣，冇咗呢位中場大腦，對球隊爭取佳績有一定影響。

1860慕尼黑大「比」你睇
漢諾威上仗主場以1比0擊敗凱沙羅頓後，憑較佳得失球差力壓布倫瑞克同史特加升上德乙榜首。漢諾威今仗雖然都有後衞侯巴斯、中場米克巴尼同前鋒賓斯卓普因傷無法上陣，但球隊近期表現出色，近8仗取得5勝3和佳績，加上整體實力始終遠勝格雷特霍夫，今仗乘住「一哥氣勢」，就算作客都可以贏波而回，小讓平半1.73倍上盤真係咪走寶。

其餘兩場德乙賽事，主場出擊嘅比勒費爾德現時位居尾二，護級水深火熱勢必搶攻，但球隊防線鬆散前面入埋唔夠輸，遇上剛喺打吡戰贏波士氣甚佳嘅1860慕尼黑，大細中位數2/2.5球梗係要大盤。至於凱沙羅頓同禾夫斯貝加歇冬後首戰遇勁旅但表現都唔錯，只係主場嘅凱沙羅頓係德乙火力最弱球隊之一，面對後防硬淨嘅禾夫斯貝加未必咁易咬得入，大細中位數1.5/2球捧細盤為妙。