衰鬥衰以穩為先
今晚德甲獨腳戲漢堡主場迎戰利華古遜，漢堡歇冬後兩戰全敗，利華上輪更喺主場兩球領先下反輸畀慕遜加柏，兩軍都要時間企番穩陣腳，加上雙方都有主力射手缺陣，睇番漢堡近5季有4季主場對利華古遜全開入球細，今仗預期入波都唔會多，再追1.85倍嘅中位數2.5球細盤。

（Now 670、Fox Sports Play、有線61及201台周六凌晨3時30分直播）

漢堡歇冬期大力整頓防線，簽入柏柏杜普路斯同馬拉積一對硬淨中堅，歇冬後首戰作客禾夫斯堡，喺人少打人多下僅輸1粒，防線已見明顯進步，上輪再度作客面對同級分子恩高斯達特，由於係護級關鍵戰，教練基斯度決定行險搶攻，可惜一眾中前場球員完全冇貨交，最終又輸埋，今仗重返主場遇勁旅，仲有隊長酒井高德停賽，預期基斯度唔敢再搶攻，以守為先搶得1分得1分。漢堡近期花咗近1,000萬歐元簽入甘美奧嘅巴西防守中場華萊士蘇沙，呢位21歲小將係應屆奧運金牌得主，喺最後4場都擔正，相信有助進一步鞏固防線，但前線除咗射手拉蘇加養傷外，其餘球員狀態奇差，想入利華波相當困難。

利華近5季作客漢堡4開細
利華上輪畀「作客蟲」慕遜加柏大逆轉，士氣打擊甚大，雪上加霜係有份入波嘅首席射手「小豆」查維亞靴南迪斯傷埋，鋒力大為削弱，雖然利華啱啱喺轉會市場亦有斬穫，擊敗多支勁旅以1,500萬歐元，簽入亨克19歲牙買加天才翼鋒里安拜尼，不過初嚟甫到今仗會先任後備，球隊近5季作客漢堡4次開細盤，包括上季悶和0比0，值得再追。